धनगढी, असार १० — कैलालीको गोदावरी नगरपालिका क्षेत्रमा वन अतिक्रमण हटाउने अभियानका क्रममा टेम्पो भिरबाट खसालिएको घटनाको विवाद समाधान भएको छ।
घटनामा पीडित गोदावरी नगरपालिका–४ की धनादेवी धामीलाई वन कर्मचारीहरूले ५ लाख रुपैयाँ क्षतिपूर्ति उपलब्ध गराएपछि दुवै पक्षबीच सहमति भएको हो।
क्षतिपूर्ति प्राप्त भएसँगै घटनामा संलग्न रहेको आरोपमा हिरासतमा रहेका सवडिभिजन वन कार्यालय अत्तरियाका वरिष्ठ डिभिजन वन अधिकृत कृष्णबहादुर बोहरा र वन रक्षक चेतराज फूलारा धरौटीमा रिहा भएका छन्। जिल्ला प्रशासन कार्यालयले उनीहरूलाई जनही ७ हजार रुपैयाँ धरौटीमा छाडेको जनाएको छ।
धामीले टेम्पोको क्षति तथा अतिक्रमण हटाउने क्रममा भत्काइएको घर निर्माणको माग गर्दै प्रशासनसमक्ष पहल गरिरहेकी थिइन्। इलाका प्रहरी कार्यालय मालाखेतीमा भएको छलफलपछि वन कर्मचारीहरूले क्षतिपूर्ति रकम उपलब्ध गराएसँगै विवाद टुङ्गिएको हो।
वन कर्मचारीहरूले भिरमा खसालेको सुपप्र ०१–००१ ह ३१८० नम्बरको टेम्पो गरिमा विकास बैंकको नाममा दर्ता रहेको खुलेको छ। टेम्पो खरिदका लागि लिइएको ऋण चुक्ता भए पनि नामसारी नभएकाले बैंककै नाम कायम रहेको बताइएको छ।
घटनापछि डिभिजन वन कार्यालय धनगढीको अतिक्रमण हटाउने अभियान विवादमा तानिएको थियो। वन कर्मचारी नै प्रहरी हिरासतमा पुगेपछि अभियानसमेत प्रभावित बनेको छ।
